,,ჩხუბში ოთო ნემსაძეს დაზიანებები არ მიუღია”

ოთო ნემსაძე

გორის ცენტრში მდებარე რესტორანში – ,,სპორტკაფე” – ოთო ნემსაძის მიერ გამართული კონცერტი ხელჩართული ჩხუბით დასრულდა. როგორც ,,ქართლის ხმას” აცნობეს, იმ საღამოს ,,ჯეოსტარში” გამარჯვებულმა ნემსაძემ ერთ-ერთი სუფრის წევრი მანდილოსანი შეაწუხა, რის გამოც ამ  სუფრაზე მყოფმა მამაკაცებმა ოთო ნემსაძეს პასუხი აგებინეს.

,,სპორტკაფეში”  მომხდარ ჩხუბს გორის გამგეობის კულტურის სამსახურის უფროსის მოვალეობის შემსრულებელი გიორგი პაპუაშვილი ადასტურებს, ის ასევე წინა წლის გორელი ჯეოსტარელია.

,,ჩხუბი იყო, მაგრამ ამ ჩხუბს რომელიც მის მამიდაშვილს მოუვიდა, ოთო აშველებდა. მე არ ვიცი რაზე იყო ჩხუბი, სხვა სუფრაზე ვიჯექი. ის შემიძლია ვთქვა, რომ ფიზიკური დაზიანებები ოთოს არ მიუღია” – გვითხრა გიორგი პაპუაშვილმა.

ოთო ნემსაძე კი საერთოდ უარყოფს რაიმე ინციდენტს. ,,არავითარი ინციდენტი არ ყოფილა” – იყო მისი პასუხი.

,,ქართლის ხმა” საპატრულო პოლიციის შიდა ქართლის ოფისს დაუკავშირდა. ინფორმაციის მისაღებად წერილობით მივმართეთ. მისაღებში საპატრულო პოლიციის ერთ-ერთმა თანამშრომელმა, რომელსაც სახეზე მრავალი შრამი აქვს და უფორმო იყო, სიტყვიერი შეურაცხყოფა მოგვაყენა. მისი აზრით, ჩვენ არ გვქონდა ინფორმაციის მიღების უფლება: ეს პიროვნება დაფიქსირებულია იმ ფოტოზე, რომელიც შარშან სოფელ ხურვალეთში გადავიღეთ დევნილების მიერ გზის გადაკეტვის დროს. აღნიშული პიროვნება აქციას არბევდა. ფოტოზე ასევე ჩანს საპატრულო პოლიციის მონიტორინგის სამსახურის უფროსიც .

ის პატრულის თანამშრომლები, რომლებმაც ჟურნალისტს შეურაცხყოფა მიაყენეს და რომლებიც შარშან 11 იანვარს დევნილების აქციას არბევდნენ

,,გამოათრიეთ ეს გარეთ, რას აჩერებთ ამდენ ხალხს” – ამბობდა ის. ჩვენს კითხვაზე, თუ ვინ იყო ის, გვიპასუხა: ,,მე აქ სათქმელი მეთქმის”.

ცოტა ხანში მონიტორინგის განყოფილების უფროსთან მეორე სართულზე აგვიყვანეს. მისი თქმით, აზრი არ ჰქონდა წერილობით  მიმართვას: ,,პასუხს არ გაგცემთ და  საერთოდ იცოდეთ, რომ არ მივიღებთ თქვენს განცხადებას, რადგან მხარე არა ხართ” – გვითხრა მან.

საპატრულო პოლიციის ახლადაშენებულ, შუშებიანი შენობის კორიდორში გამომძიებლები იდგნენ. ისინი საუბარში ჩაერივნენ  და თქვეს, რომ ფაქტზე სისხლის სამართლის საქმე არ არის აღძრული.

,,მაგ საქმეზე მგონი დაკავებულები  ადმინისტრაციულზე გაუშვეს” – გადაულაპარაკა ერთმა მეორეს.

Advertisements